ҚР Қарулы Күштері Әскери-теңіз күштерінің Бас қолбасшысы генерал-майор Серік Бурамбаев жұмыс сапары аясында Орал қаласына барып, әскерлерді техникалық жарақтандыру және теңіз кемелері паркін жаңарту мәселелері бойынша бірқатар кездесулер өткізді.

«Орал «Зенит» зауыты» АҚ және «Гидроприбор» ҒЗИ» АҚ кәсіпорындарында тараптар кемелерді сатып алу, оларға қызмет көрсету және жаңғырту саласындағы ынтымақтастық перспективаларын талқылады. Осы бағыттардағы өзара іс-қимылдың тиімділігін арттыру мәселелеріне ерекше назар аударылды.

«Зенит» зауытында генерал-майор 750 мың тонна сыйымдылығы бар көпфункционалды көмекші кеменің құрылыс барысымен танысты. Қазақстандық кәсіпорындар үшін өз класында бірінші болып табылатын бұл жоба отандық кеме жасау саласын одан әрі дамыту үшін стратегиялық маңызға ие.

«Гидроприбор» ҒЗИ» АҚ өкілдерімен кездесу барысында кәсіпорынның робототехникалық жабдықтарды жөндеу және қызмет көрсету, сондай-ақ қосалқы бөлшектерді жеткізу саласындағы мүмкіндіктері талқыланды. Сапар барысында гидрографиялық зерттеулер жүргізуге арналған «Сағым» жылдамдықты катеріне де тексеру жүргізілді.

ҚР Әскери-теңіз күштерінің Бас қолбасшысы қазақстандық өнімнің халықаралық нарықтағы бәсекеге қабілеттілігін арттыруға мүмкіндік беретін өндірістік қуаттарды жаңғыртудың және жаңа технологияларды әзірлеудің маңыздылығын атап өтті.